TURA: B Mahal-o nangchakegipa dingtang dingtang kamrangni bidingo chanchirimna aro songni nokni manderangna agan-talatanirangko on·na gita adita salrangna skang, Garo Hills Autonomous District Council (GHADC)-ni Chief Executive Membor (CEM) AR Marak-ni dilanichi, dingtangmancha tom·aniko North Garo Hills a·jani Bolsrong ‘B’ Mahal kal·chakramo ong·atangaha.
Ia tom·aniko GHADC Executive Committee-ni Joint Secretary PR Marak dilangaha aro tom·anio GHADC-ni Deputy CEM N Ch Marak, Deputy Chairman CG Momin, Cotton Jute, Ginger etc Grower Association-ni Chairman Aldo A Sangma aro gipin dilgiparangba bakko ra·angaha.
Ia tom·anio GHADC-ni CEM AR Marak, jinmana aganprakengon, da·o ong·enggipa Executive Committee-ni, B Mahal jolrango ra·gatenggipa dingtang dingtang project-rangni bidingo agan-talate on·angaha.
Ia tom·anio GHADC-ni Deputy CEM N Ch Marak-ba jinmana aganprakangengon, B Mahal-ni itihas aro ia jolrangko chalaiani bidingo jinmana agan-talate on·angskaaha.
Ia tom·aniko ong·atanio jolo donggipa dingtang dingtang songni nokni dilgiparangba bakko ra·angtokaha.