TURA: Ia sal somoirango salon changbri changbongarang batpile load shedding ba bijoliko kimitengani a·sel manderang neng·nikanirangko chagrongna nangtokengani gimin NPP-chi dilenggipa MDA sorkariko aro a·dokni Power Minister-ko Garoland State Movement Committee (GSMC) Pedaldoba regional unit matnangataha.
GSMC Pedaldoba regional unit-ni chairman Rimjen Ch Sangma-ni parakatani gitade, batanggimin changrango Meghalaya a·doko iandake salo konta 10 batpile bijoli kimitaniko a·doko songdongenggipa manderang changsaba nika dongkujachim indiba ia chango skanggipa changna salon changbri changbonga aro konta 10 batpilerang load shedding ka·engani a·sel a·doko songdongenggipa manderang neng·nikanirangko chagrongna nangtokengachim.
“Ian namen kratcha·na nangani aro Meghalaya a·dokni itihaso gualna man·gijagipa somoi ong·enga ine anga chanchia. Maini gimin ia dilgiparang da·alo an·chingni a·dokna iandakgipa obostako ra·baenga?” ine Sangma sing·doataha.
Da·ororo Garo Hills-o ding·dugaaniko chakna nangengmiting somoio salon konta 10 batpilerang bijoliko kimitengani giminba GSMC-ni dilgipa, a·dok sorkariko aro MeECL-ko matnangataha.
“Ding·dugaaniko chakna nangengani gimin Garo Hills-oba skulrangko chutti wataha aro manderangko noktangtango nape dongchina sorkari ku·pattienga indiba angni sing·anide Garo Hills-o bijoli gri manderang noko nape dongna man·genma? Saloba waloba bijoli dongjani a·sel manderang dongtogijaniko man·engani giminan chiringrangonasa re·ange an·tangtangko ka·sinate dongna nangtokenga,” ine Sangma parakataha.
A·doko bijoli chu·onggijaniko ta·raken namatchina aro manderangna dongtoaniko on·na gita bijoli kimitani somoiko ta·raken bakkandikatchina gitaba ua, a·dok sorkariko aro MeECL-ko didiataha.