SHILLONG: Meghalaya a·doko mikkarang chu·onga gita wakujaskalde bijolini obostarang apsankuaigen ine Budbar salo, a·dokni Power Minister Abu Taher Mondal parakataha.
Iani bidingo kobor ra·timgipa manderang baksa agangrikengon, pangna bilside February aro March jarangoba a·doko nanga gita mikkarang warongaiachim indiba ia changed mikkarang chu·onga gita wajaenga ine Mondal parakataha.
Mondal-ni parakatani gitade, samba jolrango donggipa gipin a·dokrangode nanga gitan mikkarang waengachim indiba Meghalaya a·dokode mikkarang chu·onga gita wajaenga.
“Batanggimin salrangode an·chingoba mikkarang adita waangahachim indiba mikka waani chu·ongkujaenga,” ine Power Minister aganaha.
Chirang dongjani gimin Leshka Hydroelectric Power Project-kode sorkari chu·gimik chipatsrangna nangao ga·akaha ineba Mondal parakataha.
Mondal-ni aganani gitade, Umiam-oba chirang da·o tang·onrikrikangengahachim.
“Batanggimin chang angni nipilani somoio Umiam-o chi tu·ani feet 3700-mang ong·achim indiba da·o chini tu·a komiroroangengaha. Da·o dipetde chi tu·ani namengkua indiba mikkangchi chi komirorongahaode chinga ia hydroelectric plant-ko chipna nangnaba dongaha,” ine Power Minister aganaha.
Load shedding ba bijoli kimitani somoiko man·a dipet bakkandikatna sorkari jotton ka·engachim ineba Mondal parakataha.
“Indiba load shedding-ko chu·gimik ra·galna gitade chinga wachi sokbaaniko sengna nangaon ga·akaigen,” ine ua aganaha.
Bijoliko Power department breengachim indiba bijoli chu·ongjani a·sel aro damrang rakdugaani a·sel nanga gita brena man·jaenga ineba Mondal parakataha.