TURA: Bristibar salo, Meghalaya a·dokni Chief Minister Conrad K Sangma, Tura Medical College baksana West Garo Hills a·jani dingtang dingtang biaprango ka·enggipa project-rangko niangaha.
Skanggipao ua, Tura-oni km 7-mang chel·ao donggipa Doldegre-o rikenggipa Tura Medical College-ko niangaha aro ia medical college-ni kamrangko niangani somoio ua Health department-ni official-rang, West Garo Hills a·jani Deputy Commissioner aro ia college-ko rikenggipa company-ni official-rang baksa agangrikangaha. Official-rang baksa agangrikangani ja·man jinmana talate on·angengon, ia medical college-ko rikani kamrang ka·sinengachim indiba da·o kamrangko ta·rakbatataha ine Chief Minister parakataha.
“Tua medical college-ko rikani kamrang re·baenggipa bilsini June-July jarangode matchotna nangenga. Chinga nokrangko ta·raken matchotatenba medical college-ko a·bachengatna nangnikengaha. Tura Civil Hospital-ni palangrangko bariatna gita kamrangko bakan a·bachengatgnok,” ine Chief Minister aganaha.
Ia medical college-ko rikenggipa company baksa agangrikjringe, college-ko mikkang bilsini gisepon matchotatna krengchina gita ua West Garo Hills a·jani Deputy Commissioner Jagdish Chelani-koba ge·etangaha.
Iani ja·man ua, Tura-ni Dakkopgre-o rikenggipa Youth Convention Centre aro Track & Field Stadium-koba niangaha.
Ia Youth Convention Centre aro Stadium-ko rikani kamrang ta·rakenga ine an·tangni kusi ong·aniko parakatengon, ia stadium aro convention centre-ko bilsisa atani gisepon matchotna ka·dongenga ine Chief Minister parakataha.
“Ia Youth Convention Centre aro stadium-ko bilsisa atani gisepon kulie on·na man·gen ine chinga ka·dongenga. Ian Tura jillanasan ong·aigija Meghalaya a·dok gimiknan namgni ong·gnok aro mikkangchi ia biapo national aro state level-ni dal·dalgipa kal·susaanirang aro dingtang dingtang program-rangkoba ong·atna man·gnok,” ine Chief Minister aganaha.
