SHILLONG: Meghalaya a·doko Bharatiya Janata Party (BJP)-ni gital president-ko seokani somoi ong·engaha ine BJP-ni dilgipa aro a·dokni Cabinet Minister Alexander Laloo Hek parakatenba, gital president-ko seokna gita election-ko ong·atchina didiangaha.
Ma·mongni BJP dilgiparang namnikgenchimode, ua Meghalaya BJP-ni gital president ong·e kamko ka·na kusi ong·aigen ineba Hek parakataha.
“BJP-ni niam bidikni gitade state president-na dongimin somoiara bilsignisanchim aro da·o chinga gital president-ko seokani somoi ong·engaha,” ine Pynthorumkhrah-ni BJP MLA aganaha.
Gital president-ko seokna election-ko ong·atani giminde ma·mongni BJP dilgiparangsa tik ka·gen ineba ua talataniko on·angaha.
BJP-na kakket ong·e kamko ka·gipa ong·e ua ma·mongni BJP dilgiparang, cholko on·genchimode Meghalaya BJP-ni president ong·e kamko jako ra·na kusi ong·aigen ineba Hek parakataha.
“Anga president ong·na sika sikjade maming ong·ja maina iako Delhi-ni dilgiparangsa tik ka·gen,” ine ua aganaha.
Re·baenggipa 2024 bilsini Lok Sabha election-o BJP, Shillong aro Tura Parliamentart constituency damgnion susagen ineba Hek parakataha.
Shillong Lok Sabha seat-na gitcham MLA HM Shangpliang aro gitcham IPS officer Mariahom Kharkrang-ko candidate-na a·dokni dilgiparang chanchisoengama ine sing·on, da·o dipet BJP, candidate-ko seokani bidingo chanchia dongkuja ine Hek parakataha.
“Indiba chinga a·dokni seat damgnion susagen,” ine ua aganaha.
