SHILLONG: State Reservation Policy-ni roster system-ko ra·gatani bidingo dingtang dingtang dolrangni gisepo jera ra·grikanirangko nikna man·engon, ia roster system-ko pilakni nangnikani gitan ra·gatna man·na gita a·dok sorkari, re·baenggipa May 15 tarikni ja·man tom·aniko ong·atgen ine Mongolbar salo, a·dokni Chief Minister Conrad Sangma parakataha.
A·doko roster system-ko ra·gatani bidingo chanchirimna gita tom·aniko May 15 tarikni ja·man ong·atgen ine janapatengon, ia tom·anio dingtang dingtang department-ni official-rag, dingtang dingtang civil society-ni membor-rang, toromni dilgiparang aro gipin dolrangba bakko ra·anggen ine Chief Minister parakataha.
“Uni gimin May 15 tarikni ja·man chinga chanchirimaniko a·bachengatgen aro ia tom·aniona chinga pilakkon okamatgen. Ia tom·aniona chinga MDA-o bakrimenggipa dolrang, pilak gipin political dolrang, pilak civil society-rang aro nangchongmotgipa manderangkoba okamatgen,” ine Sangma aganaha.
Roster system-ni bidingo dingtang dingtang dolrangni gisepo jera ra·grikenggipani bidingo janapatengon, dingtang dingtang department-ni chanchianirangkoba ra·aha aro iani pilak nangchongmotgipa kamrangko da·o cabinet nienga ine Chief Minister parakataha.
“May 15 tarikni ja·man state level tom·anioni a·bachenge, district level aro dingtang dingtang gadangrangoba chanchririmanggen aro man·a dipet pilak nangchongmotgipa dolrangkoba okamgen,” ine Sangma aganaha.
Ia roster system-ara Scheduled Tribe, Scheduled Caste aro gipin jatrangna, sorkarini kamrangko aro lekka poraio kange dongimin biaprangko tikatna dongimin niam ong·achim ine nikna man·a.
Khasi Hills jolrango donggipa dingtang dingtang dolrang ia roster system-ko mikkangchinasa tarichina dabitokengon, Garo Hills-o donggipa dingtang dingtang dolrangde ia roster system-ko 1972 bilsio Job Reservation Policy-ko ra·gatchengaonin donatchina gita dabiskaengachim.