SHILLONG: Meghalaya a·dokni pilak biaprangon sanchakram biaprangko rikani bidingo chanchina gita a·dokni Health department, MLA-rangni zonal committee-ko songna miksongenga.
Bristibar salo, Health department-ni senior official-rang baksa tom·e chanchirimani ja·man, kobor ra·timgipa manderang baksa agangrikengon, ua Health Minister ong·e, a·dokni dingtang dingtang MLA-rang baksa chanchirimanirangko dakna gita zonal committee-ko songna nangnikenga ine a·dokni Health Minister Ampareen Lyngdoh parakataha.
Adita salrangna skang ong·atanggipa Assembly-ni budget session-o a·dokni sanchakram biaprangko rikani bidingo bang·a MLA-rangan janaptokahani gimin ian a·dokna ka·donganiko ra·baani gita ong·enga ineba Lyngdoh parakataha.
“Constituency damantion sanchakram biaprangko namdapatna skanirang donga indiba ian sanchakram biaprangko rikanisan ong·aigija koros ong·anirangkoba nina nangani ong·enga,” ine Health Minister aganaha.
Lyngdoh-ni parakatani gitade, iani bidingo uamang jinmana u·iataniko on·gen aro MLA-rangkoba nangani kri bak ra·pana cholrangko on·gen.
Meghalaya a·dokko dingtang dingtang bak dakenba MLA-rangna ia committee-ko sorkari songe on·gen ineba ua parakataha.
“Chinga biapni kri MLA-rang baksa asonge chanchirimgen aro MLA-rangna talatanirangko on·gen. An·ching an·seng baljokani kamrangko bilakbatatna nangenga indiba iako an·ching dongimin niam gitasa dakna nanggen,” ine Lyngdoh aganaha.
Da·o dipet PWD-sa pilak nok rikani kamrangko ka·engani gimin Health department-ni engineering wing-ko bilakbatatna gitaba uamang cholrangko nienga ineba Health Minister parakataha.
National Health Mission (NHM)-ko ma·mong sorkari ra·pilna nanggenchimode NHM-o kam ka·enggipa manderangko jako ra·ani bidingo a·dok sorkari chanchina nanggen ineba Health Minister parakataha.