SHILLONG: Re·baenggipa May 10 tariko ong·atenggipa Sohiong Assembly election-ni ja·man United Democratic Party (UDP)-ko sorkarioniko ra·gale opposition-o asongatna National People’s Party (NPP)-ni ka·mikkenataniko Bristibar salo, UDP-ni working president aro Cabinet Minister Paul Lyngdoh jegalataha.
February jao ong·atanggipa Assembly election-o Khasi-Jaintia Hills-ni dam 36 seat-rangoniko NPP, dam 8 seat-rangkosan man·aiaha aro Garo Hills-o UDP seat damsakoba man·jahani gimin manderangni seokaniara pripraaha ine janapatengon, “Uamang jeko ska aganaichina,” ine Lyngdoh parakataha.
“Iandakgipa obostao an·ching maiko dakgen? Indiba ia dolgniko nangrimatgenchimode bang·bate seat-rangko man·skaenga,” ineba ua aganaha.
Mitam UDP-ni MLA-rang NPP baksa bakrimna miksongenga ine jangbingbanganiko jegalatengon, NPP-ni mitam dilgiparang UDP baksa bakrimna jotton ka·anirang donggenchimode NPP-koba UDP-ni dilgiparang, UDP baksa bakrimchina aganna man·aigen ine UDP-ni working president parakataha.
Sohiong constituency-o susaenggipa UDP-ni candidate saksa bilakgipa aro namen skia pora donggipa candidate ong·a ineba Lyngdoh parakataha.
Sohiong election-na campaign ka·engmiting somoio UDP-ni dilgiparang, election-ni ja·mande sorkariko chalaianio dingtanganiko nikna siengaha ine aganengani gimin UDP-ko da·o NPP-chi dilenggipa sorkarioniko ra·galanian nambatgipa ong·enga ine NPP-ni state president WR Kharlukhi parakatahachim ine nikna man·a.
