SHILLONG: Shillong-ni Ganesh Das Hospital-o an·pakna gita caesarian-ko dakengmiting somoio oko biji bajigipa me·chik, an·tangna sanna bananio chu·ongnikaniko man·jagenchim ong·ode ia obostani bidingo sorkari, independent inquiry ba jakgitele sandirokataniko dakatna man·aigen ine Sukrobar salo, a·dokni Health Minister Ampareen Lyngdoh parakataha.
NEIGRIHMS-ona re·ange ia me·chikko grongeani ja·man kobor ra·timgipa manderang baksa agangrikengon, ia obostani bidingo hospital-ni doctor-rang aro nurse-rangko sing·sandie ra·ani ja·man internal inquiry dakani matchotmanaha ine Health Minister parakataha.
Biji be·aniode maming simsakgijani katta dongja maina ian ong·gakanisan ong·aia indiba me·chikni ma·drangrang ia kamrango kusi ong·jaenga ong·ode independent inquiry-ko dakatna man·aigen ineba Lyngdoh parakataha.
Bi·sani sianganiara maming dakeba ma·gipani oko biji bajianio nangeja ineba Health Minister talataniko on·angaha.
Ia bi·sa siangahani gimin an·tangni suk ong·gijaniko parakatengon, ia bi·sa atchiaonin saengachim aro ia bi·sa grapjani gimin oxygen-ko on·na nangaha ine Lyngdoh janapatenba, ia bi·sa saesa siaha aro ianode hospital-o kam ka·enggiparangni maming dakgualani dongja gita nika ine Lyngdoh aganaha.
“Anga health minister ong·e ia a·selni chu·gimik daitoko jaktango ra·enga aro ia a·selo maming simsakgijani dongja ine anga talataniko on·na ska. Uni gimin iani bidingo mamingkoba chanchidapna nangani dongjaha,” ine ua aganaha.
Ia bi·sani sianio maming simsakgijani kattarang dongjani gimin sianggipa bi·sani ma·gipana ba uni nokdangna compensation-ko gamna nangani kattaba dongja ineba Health Minister parakataha.
Ganesh Das Hospital-o ong·gipa obostani bidingo independent inquiry-ko dakatna man·aigen: Ampareen
Date:
Share post:
