SHILLONG: Adita salrangna skang, Jalynteng songni bilsi 34 ong·gipa truck driver Ronin Nongkynrih-ko BSF sipairangni Pomshutia-o goe galaniko jegalna gita Sombar salo, Khasi Students Union (KSU) South Central circle, jinma tom·bimonganiko Pynursla bazaar-o ong·atangaha.
Ia tom·aniko ong·atanio KSU-ni dingtang dingtang dilgiparang, tom·bimonganio bak ra·giparangna aganprakengon, Deputy Chief Minister Prestone Tynsong-ni constituency ning·on BSF sipairangni iandake bil mesokna man·ahani gimin sing·doangtokaha.
Ia truck driver-ko so·ote galanio jak donggipa BSF-ni sakgittam sipairangko ta·raken rim·china dabianggen ineba ia tom·anio KSU-ni dilgiparang, jinmana parakataha.
Ia tom·bimonganio KSU-ni general secretary Donald Thabah aro dingtang dingtang dolni dilgiparangba dongpae bak ra·angengon, Nongkynrih-ko ka·saninggija dake so·ote galahani gimin BSF sipairangni kamko raken jegalangtokaha.
Ia tom·anio dingtang dingtang dolrang, sianggipa mandeni ma·drangrang baksa, sianggipa mandeko so·ote galahani gimin BSF-ni kosako jegale segipa lekka pal·takrangkoba nikna man·aha.
