U·IATTIMGIPAONI
TURA: Tura Civil Hospital-ni gital building-ni janggilchipak a·arang be·angengani a·sel ian hospital-na kenchakna nangani ong·engaha. Ia gital building-on hospital-ni mongsonggipa department-rang dongachim indiba ia building-ni janggilchipak a·arang be·angengahani a·sel ia building-na kenchakna nangani ong·engaha.
Hospital Superintendent-ni u·iatani gitade, ia a·arang adita antirangna skangan be·angaha aro ian gital building-ni janggilchipak retaining wall-ko rikgipa be·angani a·sel ong·ahachim.
Indake ong·engon, ia building-ni retaining wall-ko rikpilna gita kamrangko a·bachengataha aro ia biapko District Disaster Management Authority (DDMA)-ni official-rangba nieani ja·man, mikkarang jime wana nanggenchimode ia building-na kenchakna nangani ong·enga ine report-ko on·aha ine Tura Civil Hospital-ni Superintendent u·iataha.
Bristibar salo, mikka balwarang ta·rakangani ja·man a·a be·anirang bilongbatangaha aro retaining wall-ko tarina a·bachengahaoba obostarang namjabatroroenga ineba hospital-ni official-rang parakataha.
Ia building-na kenchakna nanganirang ong·engahani gimin ia rikdapgipa building-o sae dongenggipa manderangko dingtang biapona apjitna gita hospital-ni official-rang tik ka·aha ineba kobor on·aha.
Ia hospital-ni gital building-o ICU, Male Medical Ward-rang, Orthopedic, ENT Ward, Psychiatry Ward aro OPD-rangkoba donengachim ine nikna man·a.
Iandakgipa obostani gisepon hospital-o biaprang dongjani a·sel mitam saenggipa manderangkode corridor-rango donna nangao ga·akenga ine u·iatengon, ia building-ni retaining wall-ko tarimankujaskal aro ia hospital-ni building-na naljokaniko man·kujaskal manderangko bakrimchina gita Tura Civil Hospital-ni Superintendent didiataha.