SHILLONG: Meghalaya a·doko roster system-ko ra·gatkujaskal pilak department-rangon kam on·aniko dontongkuchina aro state reservation policy-ko gital dake nipiltaichina dabie a·dok sorkarina konta 48 somoiko on·anio maming aganchakanirangko on·jaengani gimin Voice of the People’s Party (VPP)-ni dilgiparang, da·al Sombar salni gisepo, uamangni jingjengatgniko jinmana parakatnaba gnang.
Iani bidingo sing·sandiaton, da·o dipet uamang a·dok sorkarioni maming aganchakanirangko man·soa dongkuja ine Robibar salo, VPP-ni president Ardent Miller Basaiawmoit parakataha.
Basaiawmoit-ni parakatani gitade, VPP-ni dabianirangko a·dok sorkari knachakna gisiko nangjaengani gimin dingtang dingtang dake jingjengatagnirangko uamang Sombar salo jinmana parakatnaba gnang.
Iani bidingo official notification-ko on·china gitaba VPP, a·dok sorkario dabiangahachim ine nikna man·a.
Roster system-ko ra·gatkujaskal kam on·aniko dontongkuchina aro reservation policy-ko gital dake nipiltaichina dabie re·anggipa Sukrobar salon VPP, dingtangmancha memorandum-ko Deputy Chief Minister Sniawbhalang Dhar-ni jako Chief Minister Conrad Sangma-na on·atahachim. Ia apsan salon, VPP-ni membor-rang, Additional Secretariat parking lot-o jinma tom·anikoba ong·atjolaha aro ia tom·anio VPP-ni president, jinmana aganprakengon, roster system-ko ra·gatkujaskal kam on·aniko dontongkuchina aro reservation policy-ko gital dake nipiltaichina uamang nangnikenga ine parakatahachim.
Ua somoio chief minister aro deputy chief minister Prestone Tynsong-ni office-o donggijaniara VPP-ko chonnikani gita ong·aha ineba Basaiawmoit parakataha.
“Uamang VPP-na kena ine chinga ma·sijachim,” ine ua aganaha.
Iarangko dabiengon VPP, Garorangni kosako iako dakenga ong·ja ineba Basaiawmoit talataniko on·angaha.