SHILLONG: Khasi aro Jaintia Hills a·jani dingtang dingtang dolrang, Meghalaya a·dokni Reservation Policy-ko gital dake taritaipilchina dabitokengon, ia dabianio Khasi aro Jaintia Hills-ni sak 36 MLA-rangkoba chakpaanirangko on·china gita Hynniewtrep National Youth Movement (HNYM) dabiangaha.
Iani bidingo kobor ra·timgiparangna talataniko on·angengon, Reservation Policy aro roster system-ni bidingo a·dok sorkari, pilak political dolrang baksaba chanchirimna siengani gimin Khasi aro Jaintia Hills-ni sak 36 MLA-rangba Reservation Policy-ko gital dake taritaipilchina ku·rangko on·na nangchongmota ine HNYM-ni president Louis Dohtdong parakataha.
“Khasi aro Jaintia Hills-ni chadamberang, nangani kri kamrangko aro biaprangko man·jaengani gimin da·o pilak political dolrang baksa tom·e chanchirimanio an·chingni sak 36 MLA-rang ku·rangko on·gen ine chinga ka·dongenga,” ine HYNM-ni president aganaha.
Dohtdong-ni parakatani gitade, Meghalaya a·doko songdongkamgipa manderangna, je jatba ong·china 80 percent-kode donna nanga ine Congress MLA Saleng Sangma-ni agananiko uamangba namnikpaenga.
Roster system-ko jegalatengon, Reservation policy-ni bidingo MDA 2.0 sorkari maming chanchirimaniko dakgija 2022 bilsio roster system-nasa office memorandum-ko tariskaaha ine HNYM-ni president parakataha.
2011 bilsini Census-o pangchake, Khasirangni jelbra jelsuani lak 16.42-na bataha aro Garorang lak 13.13-na batskaaha ine janapatengon, da·alonan Meghalaya a·doko Khasi-Jaintiarangna 40% aro Garorangna 40%-kon ja·rikengkuaniara kraani ong·jaenga ine HYNM parakataha.