Tura Civil Hospital-ni obostako sorkari name nienga: Health Minister

SHILLONG: Tura Civil Hospital-na rikdapgipa building-ni retaining wall be·angani ja·man da·o ia hospital-na aro mongsongbate ia annexe building-na kenchakna nanganirang ong·engahaon, ia retaining wall-ko rikpiltaina a·bachengengaha aro kamrangko sorkari name nirokatenga ine a·dokni Health Minister Ampareen Lyngdoh parakataha.
Lyngdoh-ni parakatani ia building-na naljokaniko on·na gita pilak nanga kamrangko ka·china ua dingtangmancha ge·etanirangko on·atmanaha.
Ia hospital-ni building-ko PWD aro Health Engineering Wing-ni technical official-rang nirokenga ine talataniko on·angengon, ia hospital-o psychiatric ward-ni oxygen tank sambao donggipa pipe-rang leak ong·ani a·sel a·arang be·na a·bachengaha aro ja·mano ia retaining wall be·angaha ine Health Minister parakataha.
Iani bidingo jagittamna skangan Tura Civil Hospital-ni Medical Superintendent (MS), jolni Health Engineering Wing (HEW)-na u·iatahachim indiba Executive Engineer, somoi gita ja·kurangko de·jahani a·sel ia pakma be·gruaha ineba Lyngdoh parakataha.
Ia building-o Orthopaedic, Medicine aro Psychiatric Ward-rang baksana ENT OPD-ba dongachim ineba Health Minister aganaha.
Ia building-o sae dongenggipa manderangko gipin biapona apjitataha ine janapatengon, da·o ia building-ko maming kamrangna jakkaljaha aro iani bidingo disaster management-naba u·iatmanaha ine Lyngdoh parakataha.