SHILLONG: Meghalaya a·doko koelarangko bikottaina gita NPP-chi dilenggipa MDA 2.0 sorkarini kamna Voice of the People’s Party (VPP) suk ong·gijaniko parakatenba, ia sorkarini ning·o man·e cha·giparangsa man·e cha·bataigen aro kangalrangde kangalsa ong·bataigen ine matnangataha.
A·doko koelarangko bikotna gita MDA sorkari, sorkari baksa nangrimgipa manderangnasa mikkang nitee licence-rangko on·na jotton ka·enga ineba VPP matnangataha.
“MDA sorkarini ja·rikenggipa niamchi man·e cha·giparangsa man·e cha·bataigen aro kangal cholgrirangde kangalsa ong·bataigen. Iandakgipa kamrango gimikkon bak ong·ate namgipa niamrangko ra·gatgenchimosa a·dokde namroro silrorona man·aigen,” ine VPP parakataha.
A·dokni obostako ma·sigijagipa aro an·tangni nisan donako ma·sigijagipa mandesa a·dokko re·dilenga ine suk ong·gijaniko parakatengon, “Meghalaya a·dokko MDA 2.0 sorkari, Million Dollar 10 economy ong·gipa a·dok ong·atgen ine Chief Minister, Budget Session-ni somoio rasong chabee aganaha. A·doko konta 10 batpile bijoliko kimitachi aro bijoli gri iandakgipa nisanko chu·sokatna man·genma?” ine VPP sing·doataha.
A·doko indita kontarangna load shedding-ko ka·ani ba bijoliko kimitaniara Power department-o sorkarini kam ka·sretaniko mesokanian ong·enga ineba VPP matnangataha.
“Bijoliko konta 10-mang ong·pile kimitengani a·sel karkanarangko chalaienggipa aro bijolio pangchake bading chiwalanirangko ka·e cha·enggipa manderang neng·nikanirangko chagrongna nangtokenga. Iani a·selan dingtang dingtang company-rang bang·en kajinarangko gimaatna nangenga. Bijoliko iandake kimitengani a·sel dingtang dingtang porikkarangna tarienggipa chatro chatrirangba neng·nikanirangko man·enga. Ia chasongo internet-an skie on·ani aro skie ra·ani mongsonggipa kol gita ong·engachim indiba bijoliko kimitsimsimengani a·sel chatro chatrirang bang·en gimaatna nangao ga·akenga,” ine VPP parakataha.