SHILLONG: Tol·gipa gari lekkarangko tarie on·anina rim·ako man·gipa East Garo Hills a·jani district transport officer (DTO)-ni bidingo talbate ma·sina ra·na gita report-ko bi·ataha aro report-ko name nichengani ja·manosa ia transport officer-ni kosako sorkari nanga gita ja·kurangko de·anggen ine Sombar salo, a·dokni Deputy Chief Minister aro Transport Minister Sniawbhalang Dhar parakataha.
“DTO-ni kosako maming ja·kurangko de·na skangba anga report-na sengkuna nanggen,” ine Dhar, kobor ra·timgiparangna aganaha.
Rim·a man·gipa DTO-ko kam dontongatgen dontongatjawa da·o dipet ua mamingkoba aganna man·kujawa ineba Transport Minister parakataha.
“Ia obostani bidingo anga name kobor ra·na man·kujaenga. Uni gimin mai obosta ong·a uko anga name ma·sie ra·chengkuna, uni ja·man anga na·simangna u·iatna man·gen,” ine Dhar aganaha.
Tol·gipa gari lekkarangko tarie on·ani gimin East Garo Hills a·jani DTO Gene Kelly G Momin-ko Assam police-rang, Sonibar walo rim·ahachim.
Koborko on·ani gitade, adita salrangna skang, Assam a·dokni Goalpara a·jao, police-rangni dakrongbewal gita ramarango re·ruraenggipa garirangko nirok sandiengmiting somoio, Gulam Ali minggipa mande saksaoniko tol·e tarigipa gari lekkarang (RC)-ko man·aha aro ia mandeko police-rang sing·sandion, ia gari lekkarangko tarina gita East Garo Hills a·jani DTO-sa dakchake on·aha ine ku·rachakahachim.
Transport department-o dongnue kam ka·anirang dongengama ine sing·anina aganchakaniko on·angengon, “Kamrangko pangnan manderangni nikao ong·atna nanga aro banoba maiba ong·gija dakanirang donggenchimode, uandakgipa officer-rangni kosako ja·kurangko de·na man·na gita chingna badi ka·giparangba dongna nanga,” ine Deputy CM aro Transport Minister aganaha.