SHILLONG: Roster system aro Reservation policy-ni bidingo VPP, Sorkariko sinjetna jotton ka·genchimoba, darangni jedakgipa sinjetaninaba sorkari nom·e on·jawa ine Cabinet Minister Ampareen Lyngdoh aganaha.
Sing·anirangna aganchakengon, Sorkario bakrimgipa pilak dolrang baksa, pilak political party, NGO aro student body-rang baksa agangrikaniko dakna gita MDA sorkari raken kam ka·enga ine Lyngdoh aganaha.
Ia kamrang namen rakbegipa ong·a ine aganengon, Opposition member-rangni, Sorkarini kosako sinjetanio maming gualani dongja indiba iani bidingo maidakgipa ja·kuko de·gen iani bidingo chanchina sorkari chu·onga gita somoiko ra·gen, Lyngdoh aganaha.
Lyngdoh-ni aganani gitade, ia mamlarangko jako ra·e chanchina gita sorkari miksonge dongmanaha.
Sorkari ia mamlako dal·e ra·jaenga ong·ja ine ma·talatan baksa sorkari darangni sinjetaninaba nom·e on·jawa ineba ua aganaha.
“Iani bidingo chanchirimanio pilakkon man·gopatna nanggen aro darangni ku·pattianikon knae ra·na gita nanggen,” Lyngdoh aganaha.
Unomitingo roster system aro Meghalaya State Reservation Policy-ni bidingo nipiltaianiko dakkujana kingkingde sorkarini kamrangna mande ra·aniko dontongkuchina gita Voice of the People Party (VPP) sinjetaniko dakengachim.
