SHILLONG: Sohiong Constituency-ni gital MLA Synshar Lyngdoh Thabah, Mongolbar salo, gital MLA ong·e, Old Assembly-o ku·mikchetaha.
Thabah-ni ku·mikchetaniko Meghalaya Legislative Assembly-ni Deputy Speaker Timothy D Shira dilangaha aro uni ku·mikchetanio UDP-ni dilgiparang aro una kam ka·gipa manderangba dongpae bak ra·angtokaha.
Gital MLA ong·e ku·mikchetani ja·man kobor ra·timgipa manderang baksa agangrikengon, ia Sohiong constituency-na namgipa somoini a·bachengani ong·enga aro Assembly-na gital taningba ong·enga ine Thabah parakataha.
MLA-rangni kamara apsan chanchirime kamko ka·anian ong·a ine janapatengon, ua Assembly-o constituency-ni nanganirangna ku·rangko on·gen ine UDP MLA parakataha.
Uni mamatang sagi aro a·dokni gitcham home minister HDR Lyngdoh, Sohiong constituency-na bang·en kamrangko ka·aha ine janapatengon, uaba uni mamagipa sagini kamrangko da·o jako ra·e a·bachengonin kam ka·anggen aro constituency-rangna namroro silroroaniko ra·bagen ine Thabah, ku·rachakaniko on·angaha.