SHILLONG: HSPDP chief KP Pangniang, uni party-ni gital chebagipa sakgni MLA-rang mamingdakeba party-ko wate katjawa aro party-ni MLA gitcham aro NPP candidate Samlin Malngiang ua HSPDP baksa kimkim ong·e dongangkuode election-rango chenaba donga ine aganaha.
MLA-rangni election-rang changantion party-ko wate katanichi neng·nikaniko man·ronga, ‘‘Re·anggipa bilsioba HSPDP-ni sakgni MLA-rang gipin party-rango napangaha aro unigiminsa dal·gipa election-o party namedake chu·sokna man·jaha indiba rasong gnange chinga sakgni MLA-rangni an·tangtangan party-o dongtaipilaha,’’ HSPDP dilgipa aganaha.
Badiaba party uamangko salna jotton ka·naba donga indiba indake ong·jawa, ‘‘Anga ka·dongchongmota da·o dipete ua sakgni MLA-rang gipin party-ona katangjawa,’’ ua aganaha.
2023 Assembly poll-rangna skang, HSPDP uamangni sakgni MLA-rang saksa NPP-o aro sakgipin UDP-o nape gimataha.
“Political party-rang party-o dongkenggipa MLA-rangko rimongkatna nidingenga indiba HSPDF indake ong·na on·taijawaha aro anga ma·sia uamang angni nokdangtangni memborrang ong·e donggen,’’ ua aganaha.
NPP-ko bon·ate ge·gipin sorkariko dakna jotton ka·engako aro BJP uni MLA-rang gimaenga uko janaptaion da·o dipete uamang indake ong·jaenga indiba party-on name dongenga aro katani gimin maming sing·ani dongja, ua talataha.
Sohion by polls-ni gimin aganao, “Samlin, HSPDP-ko wataha aro dingtangmancha constituency-ni manderang nangchongmotako chingna matchote on·aha maina uamang party gita aro chingna chakaha aro Samlin seat-ko cheaha. Da·o ua party-ko watani ja·mano manderang ugita ong·gija nangchongmotgipa manderang on·aha aro uamang HSPDP-oni katako nangnikjaha, ua aganaha.
“Party-oni susana party-o dongkuako uamang uko nangnikenga aro Bah Samlin party-o dongode election-rango sijawa anga agana man·a,” ua agandapaha.
