SHILLONG: Meghalaya a·doko ong·gija dakgipa kamrangko ka·anirang batrorobaengani gimin niamrangko jaktango ra·na man·jana gita niam retirangko bilakbate nirokchina United Democratic Party (UDP), a·dok sorkari aro police department-rangko didiangaha.
“Mitchigrikani aro dakgrik dinggrikanirangara an·chingni a·dokni aro songsalni obostarangko namjabatatanisan ong·aigen. Uni gimin so·sojengjeng ong·atani aro kragija dakgipa kamrangko raken champengna nangenga,” ine UDP-ni general secretary Jemino Mawthoh, adita salrangna skang Shillong songjinmao taxi driver sakgniko chadrapani aro uni ja·man ong·enggipa obostarangni bidingo aganaha.
Niamko jaktango ra·na jotton ka·enggipa mande sakantini kosakon rakbatgipa sastirangko on·china gitaba ua didiangaha.
“Dakgrik dinggrikanichide an·chi pari nikgrike bon·aiani gimin darang jat ba dolni manderangba iandake dakgrik dinggrikani aro so·sojengjeng ong·atanikode namnikna man·jawa,” ine Mawthoh aganaha.
A·doko ong·gija dakgipa kamrangko champengna pilak dolrangkon bakrime kam ka·china gitaba ua didiataha.
“Darangba niamni kosako ong·na man·ja aro a·songo niamko ja·rikani dongjahaode uan a·doko chu·sokgijaniko mesokanisa ong·aha,” ineba UDP-ni general secretary aganaha.
Shillong songjinmani Police Bazar-o taxi driver sakgniko dokani ja·man dingtang dingtang biaprango kragija dake chadrapanirangko aro manderangni gam-jinrangko nisie galanirangko knasona gita man·ahachim.
Koborko on·ani gitade, Police Bazar-o manderangni dokkanrangko nisie galani gimin aro ro·ongrangko goahani gimin mande sakbongako police-rang rim·aha.