GH-o SSLC result namgijania poraigiparangosan dos ong·ja: Saleng

SHILLONG: SSLC porikkarango pass ka·anirang Garo Hills a·jarango ja·man chakengani gimin aganengon, administration gimikkon aro Education sector-ko mangba tik ong·e chalaichina gita Congress MLA Saleng Sangma a·dok sorkariko aganaha.
Garo Hills-ni skulrango porikka pass ka·giparang komiani gimin niate aganengon, ia a·selni gimin chatro-chatrirangkosan matnangaiani ong·ja, system gimikkon taritaina nangenga ine Sangma aganaha.
Science aro Maths teacher-rangkon rakkijaode aro authority-rangan iarangko nirokjaode, indide chatro-chatrirangkoara namgipa lekka bidako man·na aro porikkarango name pass ka·na ka·dongenga ine sakkirang baksa Congress dilgipa aganaha.
Da·sikkariode, bang·a skigiparangan jegalaniko dakgipa bak ra·na gita Shillongona re·batokaha ine gisik ra·ataniko on·e aganengon, aro poll-ni somoioba mittamrangde dingtang dingtang kamrango nange ra·aha ine ua aganaha.
Education infrastructure mangmangba nama ong·ja ine skime aganengon, teacher-rangnaba name skie on·ja aro aro adita private institution-rangna agrede Garo Hills-o, namgipa training institute-rang mangmangba dongja, Sangma aganaha.
Education sector-ko systematic ba tik ong·e dakchina gita party, Chief Minister aro Education Minister-ko didigen ine agana baksa, ia bilsio Meghalayaoni saksasan UPSC porikkao pass ka·angaiani giminba Congress dilgipa skima gnang aganaha.
Indakeba nikatna man·a je, Garo Hills-ni bang·bata skulrangon pass percentage 26-28-san ong·aia indake East Khasi Hills-o 73, West Jaintia Hills 71, aro Eastern West Jaintia Hills-o 64 pass percentage-ko tosusaatode name manchan ja·manchakenga.
Gipin bilsirangna bate da·sikkario 34% na bate pass percentage-ko niatgenchimode ia bilsio Garo Hills region-o pass percentage 2%  na bate tang·onaha, 31.94% chatro-chatrirangsan SSLC porikkarangko ia bilsio siaha. Ia bilsio a·dok gimikni pass percentage 51.93% ong·ea.
Garo Hills gimiko, West Garo Hills-onisan 36.58% chatro chatrirang porikkao pass ka·angaha. WGH district-o sak 9925 chatro chatrirang porikkako seaha, uamangoni sak 3,631 pass ka·angaha.
Gnigipao East Garo Hills ong·a, jeon sak 2,897 porikka segiparangoni sak 1,020 pass ka·angaha aro  35.2% average ong·e pass ka·aha. Gipin damgittam district-rangode pass ka·giparang 30% na bateba komibataha.
South Garo Hills-ode, sak 2,709-oni sak 755 san pass ka·aiaha aro South West Garo Hills-o sak 3,573 porikka segiparangoni sak 955-san pass ka·anagaha. North Garo Hills-on gimikna bate ja·man chakbataha, jeon  sak 3,821-oni sak 962-san, 25.17% ong·e pass ka·aha.
Garo Hills gimiko gimik gimang sak 22,925 chatro chatrirang ia bilsio porikkako seaha, uamangoni sak 7,323 pass ka·angaha.