TURA: Reservation policy-ni roster system-ko ra·gatani bidingo chanchirimna gita a·dok sorkarini songe on·gipa committee-o a·dokni chonchongipa Tribal jatrang, jekai Rabha, Boro, Hajong, Koch, Maan aro uandakgipa jatni dilgiparangkode watchanggalenga ine Meghalaya Indigenous Minority Tribes’ Forum (MIMTF) suk ong·gijaniko parakatenba, ia committee-o ia chonchongipa Tribal jatrangonikoba rimnapchina, a·dokni Chief Minister Conrad Sangma aro MDA sorkariko didiataha.
MIMTF-ni parakatani gitade, Reservation policy-ni roster system-ko ra·gatani bidingo chanchirimna gita sorkarini songe on·gipa committee-o ia chonchongipa Tribal jatrangonikode watchanggalenga ine nikenba, Sombar salo Meghalaya a·dokni Rabha, Boro, Hajong, Koch aro Maan jatni dilgiparang, South West Garo Hills a·jani Garodoba-o donggipa Sapthoka Community Hall-o tom·aniko ong·atangaha aro iani bidingo ku·cholsan ku·rang on·na gita Meghalaya Indigenous Minority Tribes’ Forum (MIMTF)-ko songe donangaha.
“Uni gimin ia committee-o ching gita chonchongipa Tribal jatrangonikoba rimnapchina chinga a·dokni Chief Minister Conrad Sangma aro uni sorkariko didienga,” ine MIMTF-ni president Pankaj Rabha aro general secretary Anubhav Hajong parakataha.
Apsan daken, iani bidingo Barengapara GHADC constituency-ni MDC Promod Koch-ba Meghalaya a·dokni chonchongipa Tribal jatrangkode nichanggalenga ine suk ong·gijaniko parakatenba, ia committee-o ia jatrangkoba rimnapchina a·dokni Chief Minister-ko mol·molataha.
“Meghalaya a·doko songdongenggipa pilak jatrangnan ra·chakna man·gni ong·na gita Reservation roster-ni bidingo chanchirimna committee-ko songaha aro ia committee-o dingtang dingtang political dolrangkoba bak ong·ataha. Indake ong·genchimoba, Meghalaya a·doko songdongkamgipa Koch, Hajong, Rabha, Bodo aro Maan jatrangna ku·rangko on·dilnagipakode darangkoba ia committee-o rimnapjaha ine anga nikna man·aha. Uni gimin pilakni namgninan ia committee-o ia chonchongipa jatrangni pal ku·rang on·na man·gipa dilgiparangkoba rimnapchina anga Chief Minister-ko mol·molenga,” ine Barengapara-ni MDC Promod Koch parakataha.