TURA: Meghalaya a·dokni Job Reservation Policy-ko gital dake nipiltaichina Khasi-Jaintia Hills a·jani dingtang dingtang dolrang dabitokengon, Job Reservation Policy-ko nipilanio Supreme Court-ni rai on·aniko ja·rikskachina Rajabala-ni AITC MLA Dr Mizanur R Kazi dabiangskaaha.
Meghalaya a·doko Khasi-Jaintia-rangna 40%, Garorangna 40% aro gipin Tribal jatrangna 5%-ko done gipinrangnade 15%-kosan donengani gimin Reservation Policy-ko gital dake nipiltaianio Supreme Court-ni ge·etaniko ja·rikchina Rajabala MLA dabiangaha.
“Reservation Policy-ko gital dake nipiltaichina dabitokengani gimin ia cholko ra·e anga Reservation Policy-ko nipilanio Supreme Court-ni ge·etaniko ja·rikchina a·dokni Chief Minister aro Meghalaya sorkariko didina ska. Meghalaya a·dokni Reservation Policy-o 85 percent-kode SC/ST-rangna kangenga aro ching gita komigipa jatrangnade 15 percent-san dongaiahani gimin ian Supreme Court-ni rai on·aniko manija gita ong·enga,” ine Dr Kazi parakataha.
Supreme Court-ni rai on·gipani bidingo talataniko on·angengon, 1992 bilsio sorkarini biaprangko kanganio Jaishree Laxmanrai Patil baksana Maharashtra sorkari aro Indra Sawhney baksana India Union-ni gisepo dakgrikgipa case-na rai on·anio darang Tribe/Caste-na 50 percent-na batjachina gita Supreme Court ge·etaniko on·manahachim ine Rajabala MLA parakataha.
“Darang Tribe ba caste-rangnan 50 percent bate biaprangko kangjachina Supreme Court raiko on·manahani gimin Meghalaya a·dokode ia niamko ja·rikjaenga gita ong·enga. Uni gimin reservation policy-ko gital dake nipiltaianio, Supreme Court-ni ge·etgimin gita ‘Unreserved’ category-na 50 percent-kode kangchina anga raken dabienga,” ine Dr Kazi parakataha.