AMPATI: Budbar salo, World No Tobacco Day-ko maniani bak gita South West Garo Hills a·jani Betasing C&RD Block ning·o donggipa Bandoraja Multi Facility Centre-o Awareness-cum-Oral Screening program-ko ong·atangaha.
Ia program-ko ong·atanio, manderangni ku·sikrangko porikka ra·e niangan baksana ta·makku jakkalni namgijanirangko aro COTPA Act-ni bidingo talate on·angaha aro wagam natani bewalrangkoba manderangna dake mesokangaha.
Ia program-ko NHM aro NTCP-ni ning·o ong·atangaha aro ia program-o Ampati-ni Additional SP TD Sangma, District School Education Officer, Dental surgeon-rang, a·jani medical officer-rang, NTCP-ni Nodal Officer, Bandoraja songni Nokma, Village Health Council-ni membor-rang, dingtang dingtang skulni principal, skigiparang, chatro chatrirang aro gipinrangba bakko ra·angaha.
Ia program-ko ong·atanio Ampati-ni Addl SP, jinmana aganprakangengon, mande jinmani biaprango ta·makku ringaniko champengna gita COTPA Act-ko ra·gatchina didiangenba, ta·makkurangoni chel·e dongchina chadamberangko mikrakatangaha.
Bilsi 18-ni ning·o ong·kuenggipa chadamberangna ta·makku palaniko rim·a man·genchimode COTPA Act-ni section 6 ning·o rim·ako man·gen ine dokkan dakenggipa manderangna mikrakataniko on·angengon, pekatgipa bosturangoni chel·e dongchina aro an·tangtangko an·seng baljoke rakkichina gita Sangma, chadamberangko didiangaha.
Ta·makku jakkalaniko jegale rally ba re·jomanio nambatgipa aro poster campaign-o nambatgipa skulrangnaba ia program-ko ong·atanio boksisrangko on·angjolaha.
