TURA: Allopathic medicine ba doctor-rangni sagiparangna on·gipa samrangko bazar antidamrango niam gri palbadingenggipa manderangna Trading for Non-Tribal (TNT) licence-rangko on·engani gimin West Garo Hills a·jani Durama Imbama Norimbi Dikkimbi A·chik Ma·giparang (DINDAM) dol, Garo Hills Autonomous District Council (GHADC)-ni Taxation department-ko sing·doataha.
Koborko on·ani gitade, adita salrangna skang, DINDAM dolni dilgiparang, South West Garo Hills a·jani Garobadha bazar-ona re·angon, ia bazar antio niam gri samrangko manderangna palaniko nikna man·aha.
Garobadha bazar-o niam gri samrangko palenggipa manderangara Assam a·dokni Mankachar-oni re·bae palbadingenggipa manderangsa ong·achim ineba u·iataha.
“Garobadha antio doctor-rangni samko niam gri palbadingenga ine chingna mande saksa phone gita aganatahani gimin chinga re·bae am·sandianirangko dakon, ia biapo niam gri sam palenggipa mande salgittamko nikeaha. Ia manderang, maming department-ni nangchongmotgipa lekkarang grisa, doctor-rang gita dakmike, skia pora dongpagijagipa songni manderangna samrangko palenga. Ia manderango GHADC-ni on·gipa TNT licence-na agrede maming lekkarangba dongjachim,” ine DINDAM-ni dilgipa Jaynie Sangma parakataha.
Iandake niam gri sam palenggipa manderangni gimin name am·sandichenggija licence-rangko on·ahani gimin GHADC-ko sing·doatengon, ia manderangni skatang samrangko palanichi songni nokni manderangna kenchakna nanganiko ra·baenga ine Sangma parakataha.
Sangma-ni u·iatani gitade, iani bidingo uamang Ampati-ni drug inspector-ko gronge sing·sandion, uaba iana aiao inmananiko parakaha aro iani bidingo ta·raken am·sandianirangko dakna ku·rachakataha.
Indake ong·engon, iani bidingo DINDAM-ni dilgiparang, West Garo Hills a·jani Deputy Commissioner Jagdish Chelani-naba badi ka·e sedoataha aro niam gri sam palenggipa manderangni kosako rakgipa ja·kurangko de·china didiataha.
Niam gri sam palgiparangna TNT licence-ko on·ani gimin GHADC-ko sing·doa
Date:
Share post:
