TURA: West Garo Hills a·jao donggipa Sasatgre songoni Dharmen Gabil Momin-na Mongolbar salo, Environment Protection-ni Meghalaya Excellence Award-ko Shillong songjinmani State Convention Centre-o World Environment Day-ko manianio on·aha.
Ia award-o Momin-na gong lak 1 tangka baksana trophy aro citation-ko on·aha.
Environment Protection-ni Meghalaya Excellence Award-ko man·gipa Dharmen Gabil Momin, M/s Do·patchi Entreprise-ni nokgipa ong·a aro ua Nokrek a·bri ja·reko donggipa Sa·satgre songo Do·patchi Homestay-ko chalaienga.
Samtangtango ong·telaigiparangna ka·sagipa ong·e Momin, Nokrek a·bri ja·reko donggipa do·o mat aro sam bolrangko ripingna gisik nanggipa ong·a aro uandaken ua Nokrek a·bri aro uni wilwilao donggipa biaprangko nina re·baenggipa manderangko sokachakna gita ia Do·patchi Homestay-ko kuliaha.
