TURA: West Garo Hills a·jani Phulbari jolrango voltage chu·ongsimjaengani a·sel jolo songdongenggipa manderang neng·nikanirangko chagrongna nangtokengani gimin manderangni neng·nikanirangko namatna gita Chibinang-o rika matchotgimin Power Grid Corporation Limited-ko ta·raken a·bachengatchina A·chik Youth Movement for Betterment of Society (AYMBS), a·dok sorkario dabiangaha.
AYMBS-ni parakatani gitade, Chibinang-o rikgipa Power Grid Corporation Limited-ko uamang re·ange nieon, ia project-ko rikanirang matchotaha aro da·o ia project-ko Phulbari Sub Station (33KV) baksa chatnasan nangaiahachim ine nikna man·aha.
“Meghalaya a·dok gimikon ia sal somoirango load shedding-ko ka·na nangenga ine chinga ma·sia indiba gipin biaprango bijoliko man·engmiting somoirangoba ia jolrangode voltage-rang chu·ongjae salantian neng·nikanirangko chagrongna nangenga,” ine AYMBS-ni dilgiparang parakatenba, Chibinang-o rika matchotgipa Power Grid Corporation-ko 33KV-ni Phulbari sub-station-o connect ka·ningjaengani gimin a·dok sorkariko sing·doataha.
Phulbari jolo songdongenggipa manderangna bijoliko nambate on·na man·na gita ta·raken Chibinang-o rikgipa Power Grid Corporation-ko Phulbari sub-station baksa connect ka·china gitaba AYMBS didiataha.