SHILLONG: Meghalaya a·doko songdongenggipa je manderangan Aadhar-na bimingrangko segatkujaengachim, re·baenggipa June 30 tarik ba una skangan sorkarini donatgimin dingtang dingtang centre-rangona re·ange an·tangtangni bimingrangko segatchina gita a·dok sorkari didiataha.
Sorkari officer-rangni u·iatani gitade, district ge·antini Deputy Commissioner (DC) office, sub-division, Block aro dingtang dingtang biaprango Aadhar enrolment centre-rangko donatmanaha aro jemangan Aadhar-na biming segatkujachim, uamang ia centre-rangona re·ange bimingrangko segatena man·gen.
Ma·mong sorkarini ra·gate on·enggipa dingtang dingtang scheme aro program-rang, jekai MGNREGA, NFSA, NSAP, LPG connection, MHIS aro uandakgipa scheme-rang baksana Post-Matric scholarship-rangko ra·na gitaba da·o Aadhar-ko nangtelengahani gimin pilakkon Aadhar-na biming segatchina gita sorkari didiataha.
A·doko songdongenggipa mitam manderang, Aadhar baksa link ka·gipa mobile nombor-rangko jakkalgija dingtang mobile nomborrangko jakkale, uko Aadhar nombor baksa link ka·jani a·sel bank account kuliani somoirango OTP sokjaengani gimin pilakkon donatgimin enrolment centre-rangona re·bae, an·tangtangni mobile nomborrangko update ka·echina gitaba sorkari officer-rang u·iataha.
