SHILLONG: Meghalaya a·doko lekka porani gadangko namdapatna gita a·dokni Education department, skulrangchi re·na gisik nangjaenggipa ba kamtangko ka·na gisik nangjaenggipa skigiparangni kosako rakgipa ja·kurangko de·na mikrakataniko on·ataha.
Iani bidingo kobor ra·timgipa manderang baksa agangrikengon, skulrangchi re·na gisik nangjaenggipa skigiparang ba je skigiparangan an·tangtangni biapo, train ka·ako man·kugijagipa manderangna tangka paisarangko on·skae kamrangko ka·atengachim, uandakgipa skigiparangni gimin ma·sienga aro iandakgipa skigiparangni kosako sorkari rakbatgipa ja·kurangko de·anggnok ine Budbar salo, Education department-ni Adviser HM Shangpliang parakataha.
Kamtango gisik nangjaenggipa mitam skigiparangni bimingrangko Education department ra·manaha aro uamangni kosako ta·raken ja·kurangko de·engaha ineba Shangpliang parakataha.
Shangpliang-ni parakatani gitade, skigiparangni attendance-ko name nirokna man·na gita Education department, dingtangmancha system-ko a·bachengatengaha.
“Ian skigiparangkosan ong·aigija classroom gimikkon name nirokna gita ra·gatenggipa system ong·a. Class-ona badita sak bi·sarang re·baenga aro bi·sarangna maikai skie on·enga, ua pilakkon chinga nina gita sikenga. Skigiparangba badita sak kamtangtangko name ka·enga, uarangkoba chinga name nirikkigen aro ia system-ko ra·gatahaode chinga chingni table-onin a·dok gimikni skulrango ong·enga obostarangkon nisona man·gnok,” ine Education department-ni Adviser parakataha.
Bang·a skulrangon skigiparang chu·ongjaenga ineba ua an·tangni suk ong·gijaniko parakataha.
Shangpliang-ni parakatani gitade, sak 1000-na baten skigiparangko contract basis-o rakkichengna gita Education Minister Rakkam Sangma ge·etaniko on·manaha aro iako ta·raken jako ra·anggnok.
Je skulrangon skigiparang chu·ongjaengachim, uandakgipa skulrangna ia skigiparangko on·atgen ineba ua parakataha.
Skigiparangna somoi gita dormaharangko on·na man·jaenga ine ua an·tangba ma·sienga ine janapatengon, iani bidingo skigiparangkoba sorkari baksa bakrimchina Shangpliang didiataha.
“Mitam skigiparangko kamo regularise ka·na man·jaenga aro mitamrangde pension-ni namgnirangko on·na man·jaenga ine chinga ma·sienga indiba ia pilakkon chinga niatna jotton ka·enga. Skigiparangni neng·nikanirangko namatna chinga jotton ka·gen,” ine ua aganaha.