Ong·gija dakgipa manderangsa Assam-M’laya simao so·sojengjeng ong·atenga: Assam Minister

SHILLONG: Budbar salo, Meghalaya a·dokni West Jaintia Hills aro Assam a·dokni West Karbi Anglong regional committee-rang Shillong-o tom·aniko ong·atangenba, sima jolo ong·enggipa so·sojengjeng ong·anirangko namatna dolgni agangrikangaha.
Ia tom·aniko West Jaintia Hills regional committee-ni pal Meghalaya a·dokni Deputy Chief Minister Sniawbhalang Dhar aro Assam a·dokni Informations & Public Relations Minister Pijush Hazarika dilangaha aro ia a·jani damgnini simarango meligrikna man·jaenggipa Block I aro Khanduli-Psiar jolrango tom·tomaniko ra·bana gita chanchirimangaha.
Tom·a matchotani ja·mano kobor ra·timgipa manderang baksa agangrikengon, West Jaintia Hills aro West Karbi Anglong a·jani simarango so·sojengjeng ong·anirangko ra·bana jotton ka·enggipa manderangara Assam a·dokni manderang ong·ja aro ong·gija dakgipa manderangde pangnan ong·gija kamko ka·nasa chol ra·aigen ine Assam a·dokni Cabinet Minister Pijush Hazarika parakataha.
Assam aro Meghalaya a·dokni manderang skangonin meli-nangrime janggi tangenggiparangsa ong·a ine janapatengon, “Chinga maming dakeba Meghalaya-ni manderang baksa maming neng·nikanirang dongja aro pangnan meli nangrime janggi tangenggiparangsa ong·a,” ine Hazarika parakataha.
Meghalaya aro Assam a·dokni simarango ong·enggipa golmalrangko namatna nangenga ine janapatengon, “A·dok damgnini simarango ru·utbea bilsirangonin meligrikna man·gijaniko namatna gita man·chipkujaenga indiba anga bebera·a ia neng·nikaniko an·ching bakan namatna gita man·gnok,” ine Assam Minister parakataha.
West Jaintia Hills aro West Karbi Anglong a·jani simarango ong·enggipa golmalrangni gimin sing·on, “Ong·gija dakgipa manderangde pangnan ong·gija kamko ka·aigen. Ong·gija dakgipa manderangko an·ching iano donga maikai ma·sina man·gen. Indiba Assam-ni manderangde Meghalaya a·dokni manderangna ka·saani donga aro anga bebera·a apsan daken Meghalaya-ni manderangba Assam-ni manderangna ka·saani donga,” ine Hazarika parakataha.
Khanduli jolo adita salrangna skang, dolgni dinggrikgipani bidingo ua an·tangni suk ong·gijaniko parakatskaaha.
“Karbi aro Pnar manderangni dinggrikanina anga namen ka·a be·a. An·chingni gisepo iandake dinggrikanirang dongna nangjachim indiba dolsa dolgipinna ka·sagrikanisa dongna nangachim. A·dok damgnini manderang pangnan ka·sagrike dongangchina aro iakon chingni sorkari aro chief minister-ba nangnikenga,” ine Assam-ni Cabinet Minister parakataha.
Iana skang, Meghalaya a·dokni Deputy Chief Minister Sniawbhalang Dhar-ba ia tom·aniko ong·atani bidingo janapatengon, West Jaintia Hills aro West Karbi Anglong regional committee-rang, June ba July jarango an·tangtangni chief minister-rang baksa so·sojengjeng ong·enggipa biaprangko niena tik ka·aha aro regional committee-rangni report-rangko August jani gisepon sorkaritangtangna on·na tik ka·aha ine parakataha.
Ia regional committee-rangni changgipin tom·aniko re·baenggipa July jao ong·atangtaigen ineba Dhar parakataha.