SHILLONG: Bharatiya Janata Party (BJP)-ni kosako Congress dol, manderangko dilsretahani a·selsa Meghalaya a·doko bilakna gita man·jaenga ine ma·mongni BJP dilgiparang matnangatenba, a·doko BJP-ko bilakgipa ong·atna gitade, manderangona re·ange BJP-ni gimin ma·siatna nanggen ine parakataha.
Meghalaya a·doko BJP-ko bang·gija manderangsan ra·chakkuenga ine janapatengon, iako namatna gitade a·dokni manderangona re·ange, BJP-ni gimin ma·sisretanirangko agan-talate on·na nanggen ine BJP-ni national secretary Sunil Deodhar parakataha.
Meghalaya a·doko BJP, ru·uta bilsirangonin kamko ka·na a·bachengahaoba da·onan a·doko manderangni namnikaniko chu·gimik man·srangkujaengachim aro ia bilsini gisepo ong·atanggipa Assembly election-oba BJP, a·dok gimikni dam 60 seat-rangon susaahaoba, seat damgnikosan chena gita man·taiahachim.
Sukrobar salo, ‘Ek Bharat Shreshta Bharat’ ine pangchakaniko done BJP-ni tom·aniko BJP-ni state office-o ong·atanio BJP-ni national secretary, jinmana aganprakangengon, “An·chingni kosako chakatenggipa dolrang pangnan an·chingni kosako aganna jotton ka·ronga aro Meghalaya a·doko PM Narendra Modi aro uni dolni dal·roroaniko nikna sikjae, pangnan manderangna an·chingni gimin tol·e aganenba manderangko dilsretna jotton ka·enga,” ine parakataha.
Meghalaya a·doko BJP bilona re·bagenchimode, tangka paisa jakkalsretaniko bon·ate gipin a·dokrango gita namroro silroroaniko ra·bana man·gen ine nikesa gipin dolrang, BJP-ni kosako manderangna tol·e sakki on·enga ineba Deodhar aganaha.
BJP-ni national secretary aro Goa-ni Cabinet Minister Nilesh Cabral-ni agangipa kattarangna chakpae aganangskaengon, “Goa Minister-ni aganani gitan, Goa a·doko BJP-ni sakgni ba sakgittam MLA-rangsan dongaiachim aro election changantian Congress aro gipin opposition dolrang, Goa-o BJP bilona re·baode Kristianrang bon·gnok ine bilake sakkirangko on·rongachim,” ine Deodhar parakataha.
“Da·o batanggimin bilsi 10-na Goa-o BJP sorkariko rikaha aro bang·a Kristianrang MLA-rang aro Minister-rang ong·aha indiba uano Kristianrangna maming ong·jaha aro batesa Kristianrang pilakni gitan namroro silrorona man·engaha. BJP darangkoba mikkang nitegipa ong·jani giminsa Goa-oba Kristianrang da·alo pilakni gitan namroro silrorona man·enga,” ine ua aganaha.
Congress dolko matnange aganangskaengon, Congress sorkarini somoio a·song gimikon Kristianrangsan ong·aigija, salgro salaramni manderang aro gipinrangba mikchepanirangko, onchepanirangko aro uandake kal·ake roako man·na nangaha ine BJP-ni national secretary parakataha.