SHILLONG: Khasi Hills Autonomous District Council (KHADC)-o United Democratic Party (UDP)-chi dilenggipa Executive Committee-ni kosako Opposition Congress dolni bakrimanichi National People’s Party (NPP) Sombar salo, No-Confidence Motion-ko ra·gatangani ja·man UDP-chi dilenggipa Executive Committee (EC) be·gruaha.
No-Confidence motion-ko ong·atanio KHADC-ni CEM Titosstarwell Chyne-ni kosako sak 17 membor-rang vote ka·ani ja·man, Chyne-chi dilenggipa Executive Committee be·gruaha ine KHADC-ni Chairman Lamphrang Blah parakataha.
Chyne-ni kosako pu·ongipa sak 17 membor-rangoni sak 11-de NPP aro sak 6-de Congress MDC-rang ong·achim.
KHADC-o UDP-chi dilenggipa EC be·gruani ja·man, gital chief executive membor-ko seokna gita election-ko Mongolbar salo ong·atanggen ine KHADC-ni Chairman Lamphrang Blah parakataha.
Titosstarwell Chyne-chi dilenggipa Executive Committee be·gruani ja·man, CEM-ni kamna susana gita NPP-ni MDC Pyniaid S Syiem, nomination-ko file ka·angskaaha.