SHILLONG: Meghalaya a·doko 108 emergency ambulance service-ko chalaigipa GVK-EMRI-ko chipna gita a·dok sorkarini u·iataoni da·o bilsisa ong·na sipilengahaoba a·doko ia 108 emergency service-ko chalaikamnagipa company-ko sorkari man·skakujaenga ine u·iataha.
A·dokni Health Minister Ampareen Lyngdoh-ni parakatani gitade, a·doko songdongenggipa manderangni namgnina 108 emergency service-ko chalaikamnagipa company-ko a·doko ta·raken songna nangengahachim.
Batanggimin bilsirangonin Meghalaya a·doko 108 service-ko GVK-EMRI-sa chalaiengachim indiba ia company baksa songgigrikaniko sorkari bon·atani ja·man da·o 108 service-ko a·dok sorkari an·tangan temporary basis-o chalaiengachim.
Iani bidingo kobor ra·timgipa manderang baksa agangrikengon, a·doko 108 emergency service-ko maikai nambate chalaina man·gen, uko Health department da·o name nienga ine Sombar salo, a·dokni Health Minister Ampareen Lyngdoh parakataha.
Meghalaya a·doko 108 service-ko chalaina gita National Health Mission (NHM)-de professional ong·gipa dol ong·jawa ine janapatengon, 108 service-ko kam ka·enggipa manderang sorkarina memorandum-ko on·manaha aro sorkari, 108 service-o kam ka·enggipa manderangni namgnirangko nichengna nangnikenga ine Lyngdoh parakataha.
“Uni gimin da·o dipetde chinga uamangni kamrangko naljokate, da·o gital company jako ra·ahaode uamangna pilak man·gnirangko on·na nangnikenga,” ine Lyngdoh aganaha.