SHILLONG: Meghalaya a·dokni bang·a biaprangon matchurang Lumpy Skin Disease (LSD)-ko man·tokengani gimin a·dokni manderangna be·enrangko cha·ani bidingo sorkari agan-ku·pattianirangko on·ataha ine Sombar salo, a·dokni Health Minister Ampareen Lyngdoh parakataha.
Iani bidingo kobor ra·timgiparangna talataniko on·angengon, “Sorkarini daitoara matchurango man·enggipa sabisi sakanchirangni gimin nangchakegipa department-rangoniko ku·pattianirangko ra·e manderangna ku·pattianirangko on·skaanian ong·a aro uandaken sorkari, sabisi sakanchi man·ani somoirango be·enrangko cha·ani bidingo manderangna ku·pattianirangko on·ataha,” ine Lyngdoh parakataha.
Lyngdoh-ni parakatani gitade, matchurango sabisi sakanchirangko man·engani gimin manderangni namgnina ia sabisirangni gimin u·iatani aro ku·pattianirangko on·anian sorkarini daito ong·achim.
“Na·tokrango formalin samrangko man·engani giminba porikkarangko ra·aha ine chinga nikna man·aha aro na·tokrangko cha·anioba manderangna an·seng baljokaniko on·na gita simsake cha·china mikrakatanirangko on·aha,” ine Health Minister aganaha.
Line department-rangni ku·pattianirangko man·soahani gimin manderangna u·iatskaaniara sorkarini daitoan ong·a aro iandakgipa cha·anirangko cha·ani bidingo sorkari, pangnan manderangna ku·pattianirangko on·enga ine Lyngdoh parakataha.
Meghalaya a·doko gimik mang 6,740 matchurang, Lumpy Skin Disease (LSD)-ko man·aha aro ianoni mang 45 matchurang, a·dokni dingtang dingtang biaprango siaha ine sorkari official-rang parakatahachim.
Sorkari official-rangni parakatani gitade, LSD-ko man·e sianggipa mang 45 matchurangoni mang 30-de West Jaintia Hills a·jao, mang 8-de Ri Bhoi a·jao, mang 5-de South West Khasi Hills-o, mangsade East Khasi Hills-o aro mangsade Eastern West Khasi Hills a·jao ong·achim.
LSD-ko man·gipa mang 6,740 matchurangoni mang 1477-de Ri Bhoi a·jao, mang 1353-de West Jaintia Hills a·jao, mang 1081-de Eastern West Khasi Hills a·jao, mang 989-de South West Khasi Hills-o, mang 980-de East Khasi Hills-o, mang 560-de West Khasi Hills-o, mang 152-de West Garo Hills-o, mang 60-de East Garo Hills-o, mang 43-de East Jaintia Hills-o, mang 32-de South Garo Hills-o aro mang 13-de South West Garo Hills a·jao ong·a ineba sorkari official-rang parakatahachim.