BAGHMARA: Adita salrangna skang, South Garo Hills a·jani skul damsao, chatro saksako doke sasti on·anina FIR ka·doako man·gipa skigipako skulni dilgiparang, kamoniko ra·galataha ine kobor on·aha.
South Garo Hills a·jani St Francis De Sales School-o chatro saksako kragija dake doke sate sasti on·ahani gimin ia skulni skigipa Surujuddin Ali-ni kosako Rongara-Siju constituency-ni gitcham MLA Rophul S Marak, FIR ka·doangahachim.
Indake ong·engon, ia skigipani ong·gija kamna skulni dilgiparang, ia skigipako kamoniko ra·galataha ine Sombar salo, skulni dilgiparang kobor on·ataha.
Iani bidingo SFDS-ni skul managing committee (SMC), talataniko on·atengon, ia skigipani kosako FIR ka·ani ja·man, SMC-ni gitaba ia a·selni bidingo inquiry-ko dakaha aro inquiry-ko dakon, chatro sakgni classroom-o skigipani kam ka·engmiting somoio jegrikna a·bachengaha ine parakataha.
“Skigipani classroom-o dongengmiting somoion ia chatrorang jegrikahani gimin chatro sakgnikon mikkangona okamaton, chatro saksade mikkangona re·angaha indiba sakgipinde je gita aganoba maniteljaha. Classroom-o niam retirangko ja·rikna nangani gimin aro mikkangchi chatro chatrirang iandake skigiparangni kosako ong·gija kamrangko ka·jachina gita ia skigipa, chatroni kosako nanga gita sastiko on·na nangaha,” ine skulni SMC parakataha.
Indake ong·engon, da·o skulo obostarang nampilaha aro mikkangchi iandakgipa obostarang ong·taijawaha ineba skulni skigiparang, skulo poraienggipa bi·sarangni ma·a paarangna ku·rachakaniko on·ataha.