SHILLONG: Khasi Hills Autonomous District Council (KHADC)-o United Democratic Party (UDP)-chi dilenggipa Executive Committee (EC)-ko be·gruatanio jak dongja ine National People’s Party (NPP)-ni national president Conrad K Sangma aro gipin dilgiparang a·kangatani ja·man, UDP-chi dilenggipa EC-ko be·gruatanio Congress dolni dilgiparangba jak dongja aro ian NPP aro UDP-ni gisepo meligrikjani a·selsa ong·aha ine Meghalaya Pradesh Congress Committee (MPCC)-ni president Vincent H Pala-ba parakatskaaha.
Re·anggipa Sombar salo, KHADC-ni gitcham chief executive membor Titosstarwell Chyne-ni kosako NPP aro Congress dolrang bakrime, No-Confidence-ko motion-ko ra·gatangani ja·man UDP-chi chalaienggipa EC be·gruna gita nangahachim ine nikna man·a.
Iani bidingo talataniko on·angskaengon, NPP aro UDP-ni gisepo meligrikna man·jaesa iandakgipa obostaona sokaha aro ia ja·kuko de·na gita NPP-ni ku·monganiko on·atani ja·manba Congress dol chanchirimenba, AICC-ni ra·chakaniko bi·chengaha ine Pala parakataha.
KHADC-o NPP baksa kam ka·na tik ka·ani gimin talataniko on·angengon, Sixth Schedule-ko taridapani bidingo Congress dolde an·tangtangni nangnikanirangko on·na man·pajahachim indiba da·o NPP baksa EC-ko rikna chol ong·ahani gimin a·dokni Tribal manderangko chel·chakna gita Sixth Schedule-ko taridapanio an·tangtangni nangnikanirangko on·na man·pagnok ine MPCC-ni president parakataha.
Sixth Schedule-ko nosto ka·na jotton ka·a ine BJP-ko matnangatengon, 2019 bilsio ma·mong sorkari, Sixth Schedule-ko taridapna gita Bill-ko ra·baahachim aro uni ja·man Home Affairs-ni committee-ba ma·mong sorkarina ku·pattianirangko on·ataha ine Pala parakataha.
Indake ong·engon, Khasirangni namgninasa KHADC-o Congress dol, NPP baksa bakrime Executive Committee-ko rikna tik ka·aha ine Congress dolni MDC Ronnie V Lyngdoh-ba parakataha.