TURA: Garo Hills-o Secondary School Leaving Certificate (SSLC) porikkani result-rang tang·dona gita man·jaengani gimin result-rangko namdapatna man·na gita Budbar salo, a·dokni Education Minister Rakkam A Sangma, Garo Hills gimikni secondary aro higher secondary skulni principal-rang baksa tom·e chanchirimangaha aro ia tom·anio Education department-ni Advisor HM Shangpliang, Meghalaya New & Renewable Energy Development Agency (MNREDA)-ni Chairman Rupert Momin, Education department-ni Commissioner & Secretary Pravin Bakshi, School Education & Literacy-ni Director Swapnil Tembe, Meghalaya Board of School Education (MBOSE)-ni Executive Chairman Ambrose Ch Marak, Garo Hills gimikni Deputy Commissioner-rang aro Education department-ni officer-rangba dongpae bak ra·angaha.
Ia tom·aniko a·dokni Education Minister Rakkam Sangma dilangengon, Garo Hills-o SSLC porikkani result-rang tang·dona gita man·jaengani gimin a·selrangko name am·sandina aro result-ko namdapatani cholrangko sandina gita ia tom·aniko ong·ataha ine parakataha.
Ia 2023 bilsini SSLC porikkaoba Garo Hills-ni bang·bata chatro chatrirangan pass ka·na man·jahani gimin an·tangni suk ong·gijaniko parakatengon, India a·songo Meghalaya a·dokan drop-out rate ba poraianiko dontonganio bang·batgipa ine channako man·enga aro adita salrangna skang Samagra Shiksha Abhiyan (SSA)-ni tom·aniko ong·ate am·sandion, Lower Primary gadango sak 30,000 aro Secondary level-o sak 36,000 chatro chatrirang poraianirangko dontongaha ine ma·sina man·aha ineba Education Minister talataniko on·angaha.
Ian a·dokni manderangna namen jajrengna nangani ong·enga ine janapatengon, chatro chatrirangni drop-out rate-ko komiatna gita name am·sandienba ja·kurangko de·na nangenga ine Sangma parakataha.
Ia bilsini SSLC porikkao pass ka·ani percentage tang·onahani gimin Education department-ni Advisor HM Shangpliang-ba an·tangni suk ong·gijaniko parakatengon, maini a·sel chatro chatrirangni result-rang tang·dona man·jaenga ine dingtang dingtang skulni principal-rangko sing·doangenba jolo nangani kri ja·kurangko de·na man·na gita iani bidingo am·sandianirangko dakchina ge·etangaha.
Education department-o nangchakegipa kamrangko da·o a·jatangtangni deputy commissioner-rang nirokanggnok ineba Shangpliang ia tom·anio parakataha.
Ia tom·anio District School Education Officer-rang aro dingtang dingtang skulni principal-rangni parakatani gitade, ia bilsini SSLC porikkao, West Garo Hills a·jani skul dam 3, East Garo Hills a·jani skul dam 8, North Garo Hills-o dam 3 aro South Garo Hills a·jao skul dam 5-o pass ka·ani percentage 0% ong·ahachim.
Mikkangchi result-rangko namdapatna gita a·selrangko name sandienba ja·kurangko de·angna gita dambonga a·jani deputy commissioner-rangba ia tom·anio ku·rachakangaha.
