SHILLONG: Meghalaya a·doko bijoliko chu·onga gita man·jaengani gimin balwa aro salni bilrangchi bikotgipa bijoliko a·dok sorkari dal·bate jakkalna miksongenga ine Sukrobar salo, a·dokni Power Minister AT Mondal parakataha.
Sukrobar salo, Promotion of Clean Energy Access in North East India ine pangchakaniko done National Seminar-ko ong·atanio bak ra·e jinmana aganprakangengon, a·doko balwa aro salni bilchi bikotgipa bijoliko jakkalna sorkari da·osa a·bachengatenga indiba bijoliko pilak gadangni manderangan jakkalna man·na gita sorkari subsidy-rangkoba on·na miksongenga ine Power Minister parakataha.
Ia new & renewable energy-ko sorkari, dingtang dingtang department-rangna, hospital-rangna aro gipinrangnaba on·na miksonganirang dongenga ineba ua aganaha.
Ia National Seminar-ko Meghalaya New & Renewable Energy Development Agency, New & Renewable Energy Ministry baksa nangrime ong·atangahachim.
Ia seminar-o Power Minister-ni parakatani gitade, Meghalaya a·doko bijoliko chu·onga gita man·jaengani gimin balwa aro salni bilrangchi bikotgipa bijolirangko jakkalaniara namgipa chol ong·enga.
Ia national seminar-ko ong·atanio Centre for Science & Environment (CSE), Association of Renewable Energy Agencies of States (AREAS), IIT Guwahati aro North East Centre for Technology Application & Research (NECTAR)-ni official-rangba dongpae bakko ra·angaha.
