SHILLONG: Nalarango chirang jokna man·jae sikkonge dongahani a·selsa Bristibar pringo, PA Sangma Stadium-ni retaining wall ba ra·chakgipa pakma be·wakna gita nangaha ine engineer-rang aro contractor-rangni report-ko on·angani ja·man, a·dokni Chief Minister Conrad K Sangma parakataha.
Sukrobar salo, engineer-rang aro contractor-rangni on·gipa report-ko Sports department aro PWD official-rang baksa nipilangani ja·man kobor ra·timgipa manderang baksa agangrikengon, stadium-o chirang joke katna tarigipa nalao chirang chang·kete dongna nangahani a·selsa ia pakma be·wakna gita nangaha ine Chief Minister parakataha.
“Engineer-rang aro contractor-rangni report-o parakani gitade, PA Sangma Stadium-o chirang joke katna gita nalarang dongachim indiba ia nala gita chirang jokangna man·jae sikkonge dongna nangahani a·selsa ia stadium-ni pakma be·wakangaha,” ine Chief Minister parakataha.
PA Sangma Stadium-ko bakgni dake rikaha ine janapatengon, skanggipa bak, jeon football stadium-koba man·chapahachim, iakode matchotaha aro iako rikanio gong kror 50-mangni gita koros ong·aha ine Chief Minister parakataha.
Stadium-ni gnigipa bak, jeon indoor stadium-koba man·chapachim, iani bidingo talataniko on·angskaengon, ia gnigipa bakko da·o rikengmitingchim aro kamrangko ka·anio nalarango jabolrang gape, chirang sikkongna gita nangahani a·selsa iandakgipa a·sel ong·na nangaha ine Sangma parakataha.
Chief Minister-ni parakatani gitade, ia stadium-ni gnigipa bakko rikanio komibeoba gong kror 70-mang koros ong·engachim.
