PA Sangma Stadium be·anini gimin TMC, sandichina dabia  

Tura: TMC youth dilgipa, Richard Marak, PA Sangma Sports Complex-ni wall ba pakma be·ani gimin sorkariko matnange, ia mamlako jakgittelgipa central agency-ni jakchi sandianiko dakchina dabiangaha.
“MP Agatha Sangma aro CM Conrad Sangma- uamang sakgnian, ia mamlao dingtang dingtang kattako aganenga. MP Agatha, sport complex-ni pakma be·anina contractor-rangko ba rikgiparangko dosi gale aganaha aro uamangni kosako sorkariko ja·ku de·china nangnikaniko aganaha. Indiba CM Conrad, dingtang kattakosa aganskaenga, drain block ong·ani giminsa be·aha, pakmako rikanio maming gualani dongja ine aganskaha,” ine Richard aganaha.
“Adasa sakgnian dingtanggrike kattarangko aganaha, uni gimin chong·mot obostako u·ina ba mainimancha pakma be·aha, iako talna gita central agency-ni jakchi sandiatna nanga. Chong·mot obostako u·ina nangchongmota uo pangchake mikkangchi kamrangko ba ja·ku de·na man·gen aro uandakgipa obosta ong·ako champengna man·gen.”
“Sorkariko cha·bokanina, complex-ko rikanio safety audit dongjani gimin matnanga man·aha, iarangan haida complex be·ani a·selrang ong·naba gnang. Mikka wachi karini somoio iandakgipa dal·dalgipa infrastructure-rang be·a ong·ode, ian public ba ramram manderangni tangkako indin bon·ataming apsanaia, uni gimin sorkari, kamtangko talate on·na nanga.”
Election-ni somoio complex-ko rika matchotkujaon stadium-ko oprakate on·ani gimin gimik political dolrang, matnangahachim.
“Stadium-ko oprakate on·ao, ia stadium ‘world-class’ aro a·songni dal·batgipa pre-engineered composite football stadium ong·a ine a·dok sorkari janapaha. Indiba oprakate on·ani jadok somoion ua world-class stadium, be·aha, a·songo dal·batgipa nambatgipa stadium ong·ode maidake ta·rake be·aha ine Richard sing·aha.?