SHILLONG: PA Sangma stadium be·anina adita dingtang dingtang dolrangoniko matnanga man·engon a·dok sorkari, Sonibar salo talataniko on·ataon, Stadium-ko rikanio chu·gimik technical guideline ba niamrangko ja·rikaha, stadium-ni pakma be·ania a·selara ong·telaigipa a·selni giminsa ong·a jean darang jako ong·ja, ine talataha.
“Stadium-ni bang·gija pakmasan ga·akaha ba be·aha, mongsonggipa stadium be·ja, mikka jime waanganichi chirang skatani a·selsa pakma be·aha,” ine MDA-II-ni spokesperson ba koborna ku·wattimgipa aro cabinet minister Marcise Marak, talataha.
PA Sangma stadium-ni be·anina bang·arang sorkariko matnangtokaha, iana aganchakatengon, “beben ia mamlao sorkariko matnangenga, indiba stadium-ko rikaniko chu·gimik engineering guideline ba niamrangko ja·rikaha” ine aganaha.
Minggipin ia mamlao am·sandianiko dakchina ge·etaha, inquiry report ba sandiani report-ko man·a ja·man chu·gimikkon talbate u·igen.
Uandake stadium-ko rikgipa construction company-ni gimin sing·on, Minister indine aganchakaha, “Ong·telaigipa a·selko darangba champengna man·ja. Ian natural calamity ba ong·telaigipa a·sel ong·ani gimin chinga mamingkon dakna man·ja, ra·chaknan nangaigen. Stadium-ni be·aniara, rikanio namgijani ba niamrangko ja·rigijani a·sel ine ong·ja.”
PA Sangma Sports Complex, Garo Hills a·jao damsa niksenggipa ba iconic biap ong·a, jean mni Bristibar pringo be·aha. Iani gimin rikgipa company-ko sing·doanirang nakataha.
Sorkari, complex-ni boundary wall ba pakma be·aniko magisterial-ni gita sandichina ge·etaha.
Stadium-ni project-ko Hindustan Steelworks Construction Company jako ra·aha. Indiba stadium-ona re·ange niode project-ko Badri Rai Construction-sa jako ra·a ine nikna man·skaa. Aro mija bilsio be·grugipa gital rikenggipa Assembly-ni kamko jako ra·gipa mitam contractor-rang dongpaa.
PA Sangma stadium-ko rikanio chu·gimik niamrangko ja·rika: Sorkari
Date:
Share post:
