TURA: Meghalaya a·doko Reservation Policy-ko ra·gatchengaonin Garorangna chamgimin 40 percent-ko nanga gita man·jaha ine A·chik Conscious Holistically Integrated Krima (ACHIK) parakatenba, reservation roster-ko ra·gatengon, Garorangni man·na nangkuenggipa bak rengsirangko man·na gita batanggimin somoirangko nipilani gnangsa ra·gatchina a·dok sorkariko didiataha.
Ia Reservation Roster system-ara nichanggalako man·gipa jatrangna cholrangko on·na miksonge on·enggipa niamsa ong·enga ine janapatengon, ia Roster system-ko ra·gatanichi Scheduled Caste (SC), Scheduled Tribe, Other Backward Class (OBC) aro gipin gadangni jatrangnaba apsan bak rengsiko on·na man·gen aro roster system-ko nipilani gnang ra·gatgenchimode batanggimin somoirango dakgualanirangko ba ong·gija dakanirangko taridapna cholrangko on·na man·gen ine ACHIK-ni president Thomas M Marak parakataha.
“Pilak department-rango, skie ra·chakramrango aro public sector company-rangoba roster system-ko nipilani gnangsa ra·gatchina da·alo chinga Meghalaya sorkarina ra·bianiko on·enga. Roster system-ko nipilani gnang ra·gatanio dingtang dingtang neng·nikanirangko chagrongnaba gnang indiba iarangko pa·sike dongna man·jawa,” ine ACHIK janapatenba, iani bidingo salsnini gisepon aganchakaniko on·china sorkario dabiangaha.
