SHILLONG: Meghalaya a·doko niam gri coke ba koela so·ani karkanarangko chalaienggipa manderangni kosako ta·raken rakgipa ja·kurangko de·china Meghalaya High Court-ni ge·etaniko on·angani ja·man, West Khasi Hills a·jani Shallang jolo niam gri koela so·a karkanarangko chalaienggipa mande sakbriko, re·anggipa June-ni 26 tariko police-rang rim·aha ine West Khasi Hills a·jani Superintendent of Police (SP) Bikram D Marak parakataha.
SP-ni parakatani gitade, rim·ako man·gipa manderangara, Guwahati songjinmao donggipa Basisthapur Bye-Lane-oni bilsi 32 ong·gipa Ashish Arya, Shallang Sohbar A-oni Khrawbok Rongrin, East Jaintia Hills a·jao donggipa Rymbai Synrang Shahkhain-oni Hopeful Nongtdu aro Guwahati songjinmao donggipa Beltola Tiniali-oni bilsi 28 ong·gipa Yaman Bansal ong·a.
Rim·a man·gipa manderangko judicial custody-na pakwate on·ataha ineba Marak parakataha.
Re·anggipa June-ni 18 tarikoba West Khasi Hills a·jani Shallang jolo niam gri koela so·gipa karkanako chalaianina police-rang, Guwahati songjinmaoni Youdishtra Bhama minggipa mandeko rim·ahachim aro ia karkanaoniko ton 9000-mang ong·gipa koelarangko man·ahachim.