SHILLONG: Shillong songjinmao ramarangni apchangket ong·aniko komiatna miksonge ra·gatenggipa Shillong Western Bypass ramako tarina a·bachengatgnok aro iana kamrangko dolgittam contractor-rangna sorkari pakwate on·manaha.
Official-rangni u·iatani gitade, ia project-ni km 12.8 ong·gipa package-I-ko gong kror 185.49-na Anusha Projects Pvt Ltd – BKD Infrastructures Pvt Ltd (joint venture)-na on·aha aro ia package-na chamenggipa korosara gong kror 620.3 ong·a.
Ia project-ni km 11.9 ong·gipa package-II-ko gong kror 199.89-na Narendra Sharma – T.K. Engineering Consortium Pvt Ltd (joint venture)-na on·skaaha aro ia package-na chamgimin korosara gong kror 686.03 ong·skaenga.
Km 13.556 ong·gipa package-III-ko gong kror 154-na BRN Infrastructures Pvt Ltd-na on·skaaha aro iana chamgimin korosara gong kror 562.48 ong·enga.
Ia Shillong Western Bypass-ko matchotahaode Shillong songjinmao gari gorarangni apchangket ong·aniko komiatna man·gnok maina Assam-chipakni re·baenggipa garirang, Shillong songjinmako napna nanggijan Dawki aro Sohra-ona re·angna man·gnok.