TURA: India a·songni Prime Minister Narendra Modi-ni a·bachengatgipa ‘Adopting a Village’ program-o pangchake an·tangni deragatgipa ba jako ra·gipa West Garo Hills a·jani Gimegre songni bidingo chanchirimna gita Mongolbar salo, Rajya Sabha-ni MP Dr WR Kharlukhi, dingtangmancha tom·aniko Tura-ni DRDA Conference Hall-o ong·atangaha.
Ia Gimegre songara, West Garo Hills a·jani Demdema C&RD Block ning·o donggipa song ong·a aro Mongolbar salo, a·dokni Rajya Sabha MP WR Kharlukhi an·tangan ia songona re·ange, songni nanganirangko niangna gita miksongahachim indiba mikkarang waahani a·sel ua re·angna gita man·jae Tura-o tom·aniko ong·atangskaaha.
Ia tom·anio ua, Prime Minister-ni a·bachengatgipa program-ni bidingo talate on·angengon, ia program-ni ning·o Parliament-ni membor sakantian song damprakko derogate, songo manderangni janggi tanganiko namdapatna aro songo namroro silroroaniko ra·bae, songko Model Village ong·atna gita nanga ine parakataha.
Ia songo dingtang dingtang department-ni kamrangchi namroro silroroaniko aro manderangna janggi tangani cholrangko on·na kam ka·enga ine talatangengon, tourism gita dakgipa kamni a·barango songni manderangna kam ka·e cha·ani cholrangko on·anggen ine Kharlukhi parakataha.
Rongtal an·talanina mingsing minggamako man·enggipa Mawlynnong songni gimin janapatengon, ia song da·o an·tangtangon pangchake janggi tangenggipa song ong·aha aro ia jolrango tourism-ni gitaba kamrang tang·doengaha ine Rajya Sabha MP parakataha.
Ia tom·anio ua Gimegre songni Nokma aro songni manderang baksaba agangrikangengon, songo nanganirangko sing·e ra·enba, ia songo community hall, solar lamp aro uandakgipa dakchakanirangko on·na an·tangni MPLAD scheme-oniko on·anggen ine Kharlukhi, ku·rachakaniko on·ataha.
Ia tom·anio dongpae bakko ra·anggipa gipin manderangara, State Vision Committee-ni Member Dr Charles R Lyngdoh, West Garo Hills a·jani Deputy Commissioner Jagdish Chelani, DRDA-ni Project Director Dolrich Berin G Momin, dingtang dingtang officer-rang, Gimegre songni Nokma aro gipinrang ong·a.
An·tangni deragatgipa Gimegre songni nanganirangko Kharlukhi nianga
Date:
Share post:
