U·IATTIMGIPAONI
TURA: Re·anggipa Sonibar attamchibara, dingtang dingtang ATM card-rangko jakkale, ATM damsaoniko tangka oke ra·na jotton ka·ahani gimin police-rang mande saksako rim·aha.
Sonibar attamchibara, mande saksa dingtang dingtang ATM card-rangchi, ATM machine-ko jakkaltaitaienga ine police-rang koborko man·soani ja·man Phulbari police station-ni dolsa sipairang, Assam South Salmara a·jao donggipa Tumni minggipa songoni saksa Lotiful Islam minggipa mandeko rim·na man·aha.
Ia mandeoniko police-rang, HDFC Bank-ni king 44 ATM card-rang baksana HDFC-ni kuligimin ATM envelope-rang, IPPB aro SBI-ni ATM card kingprak, SBI aro IPPB-ni passbook, mobile phone ge 2, AS-18H 7723 scooty bolsa aro gong 10,290 tangkarangko man·aha.
Rim·a man·gipa mandeni gimin police-rang am·sandianirangko dakon ia mandeara, Assam South Salmara a·jani Tumni Post Office-o Assistant Branch Post Master-ni kamko ka·enggipa aro Baro Ravatary minggipa songni Ashraful Islam-na kamko ka·gipa ong·achim ine ma·sina man·aha.
Ja·mano Ashraful Islam an·tangba Phulbari police station-ona re·ange police-rangna bame on·eaha aro ua an·tangan Post Master-ni kamkoba ka·e, an·tangni kamrangko niam gri ka·na gita Lotiful Islam-ko jakkalskaachim ine parake on·eaha.
Ia mande sakgni, post office gita manderangna watatgipa ATM card envelope-rangko niam gri kulienba, manderangna on·atgipa PIN nomborko jakkale tangka paisarangko oke ra·ahakon ine police-rang chanchichipenga.