U·IATTIMGIPAONI
TURA: Ma·mong sorkarini ra·gatna miksongenggipa Uniform Civil Code (UCC)-ko dingtang dingtang Tribal jat aro toromrangba jegalsotokengon, A·chikrangnasan ong·aigija a·songo songdongenggipa pilak manderangni namgninan UCC-ko ra·gatjachina A·chik Baptist Dal·gipa Krima (ABDK)-ba ma·mong sorkariko mol·molataha.
Iani bidingo New Delhi-o donggipa Law Commission of India-ni Member Secretary-na seachi mol·molatengon, India a·songo dingtang dingtang jat aro toromni manderang meli nangrimao songdong a·chatokenga aro ian a·songni nitoani aro dingtanganikoba mesokani ong·a ine ABDK-ni dilgiparang parakatenba, iandake dingtang dingtang jat aro toromrangni meli nangrime songdongenggipa a·songo Uniform Civil Code-ko ra·gatgenchimode ian dingtang dingtang jatrangni daka rikanirangko aro toromrangni bebera·aniko pe·ani gita ong·gen ine talataniko on·angaha.
“Da·o dongenga gitan dingtang dingtang jat aro toromni niamrangara a·songo songdongenggipa manderangna dakchakani ong·enga aro ian ching gita Meghalaya a·doko aro salgro salaramni dingtang dingtang biaprango songdongenggipa Garorangni daka rikani aro bebera·anikoba mesokani ong·enga. Chingni chasongna ja·rikbaenggipa daka rikanirang aro bebera·anirangko chel·chakna gita Indian Constitution-ni Sixth Schedule ning·o chingna cholko on·ahani gimin chinga namen mittelbea indiba UCC-ko ra·gatgenchimode ian chingni daka rikani aro bebera·ani niamrangko kimite gala gita ong·gnok,” ine ABDK-ni dilgiparang parakataha.
Meghalaya a·doko songdongenggipa Tribal-rang aro mongsongbate A·chikrang, me·chikchipakkosa chatchi de·e gam-jinrangkoba on·rika ine talatangengon, “A·chikrang me·chikrangko chel·chake rakkianio bebera·giparang ong·a aro me·chikko nokdangni skotong dakanichisa iako chu·sokatna man·a. Iandakgipa bewalko ja·rikani giminan A·chikrangni daka rikanirang gipin jatrangoni namen dingtangtea indiba UCC-ko ra·gatgenchimode ching gita A·chikrangni iandakgipa daka rikanirang gimaani cholrang dongaha,” ine ABDK-ni dilgiparang parakataha.
A·chikrangni bebera·ani gimin janapatskaengon, A·chikrang Kristian ong·e chengoni ja·rikbaenggipa jatni daka rikanirangko ja·rikkuenggiparang ong·a aro Kristianni bewalrangan A·chikrangni daka rikanirangko ripinge rakkina dakchakaniba ong·enga ine ABDK parakataha.