U·IATTIMGIPAONI
TURA: Tura Super Market-o pipe-rang leak ong·e manderang chaktogija bibarangko chakna nangtokengani gimin aro ka·mabatgipa gadango chirang sikkonge dongengani a·sel re·ruraanirango neng·nikanirangko man·tokna nangengani gimin ia super market-ko ta·raken taridape on·china Meghalaya a·dokni Opposition Trinamool Congress (TMC) dol dabiangaha.
“Tura Super Market-ni obostako nigenchimode ian namen ra·chakna man·gijani ong·a aro ia obostako bilo ong·enggipa manderangni namatna gita maming ja·kurangko de·jaenganiara namen dukni katta ong·a. Pipe-rangni leak ong·ani aro nalarang block ong·ani a·sel chirang aro jabolrang ramarangonasa jokangenga aro ian re·ruraenggipa manderangna namen chaktogijaniko ong·atenga. Official-rangni nirok sandianirang dongjaengani a·selan Super Market-o dokkan dake cha·enggipa manderang bilongen neng·nikanirangko chagrongna nangtokenga,” ine TMC-ni chadambe dolko dilgipa Richard M Marak parakataha.
Marak-ni parakatani gitade, TMB-ni official-rang ia Super Market-ona re·angjringengachim indiba ia biapo ong·enggipa obostarangko nirokatna gisik nangtokjaengachim.
“Ia super market-ko name rikjani gimin TMB-ni CEO, contractor-kosa matnangenga indiba uamang gipinrangko iandake matnange dongaigija, super market-o ong·enga obostarangko namatna gitasa ja·kurangko de·na nanga. Tura Super Market-ko a·gilsakni gipin a·songrango donggipa biap gita ong·atgen ine Chief Minister Conrad Sangma ku·rachakahachim indiba da·alonan ia ku·rachakako chu·sokatchipkujaenga. Ia super market-ko re·anggipa bilsini Krismasna skangan taridapgen ine ku·rachakanikoba somoi gita matchotatjaha,” ine TMC-ni chadambe dolko dilgipa parakataha.
Ia super market-ko tarigipa contractor-ni kosako ja·kurangko de·ama de·kuja da·onan maming u·iatanirang dongkuja ine janapatengon, Tura Super Market-ni mikkim rasongko ra·bapilna gita ta·raken ja·kurangko de·china Marak, TMB-ni official-rangko didiataha.