U·IATTIMGIPAONI
TURA: Tura-ni Kongbe Ading jolo bilsi 28 ong·gipa mande saksa, an·tangko kae siaha aro uni manggisiko Bristibar pringosa jolni manderang nikaha.
Ia mandeara apsan gittimonin bilsi 28 ong·gipa Senches D Sangma ong·achim aro koborko man·soani gitade ua re·anggipa July 7 tarikonin gimaengachim.
Ia mandeni gimaani bidingo nokni manderang ‘missing report’-kode on·jaha indiba ja·mano nokdangni manderang, jolo songdongenggipa manderangni dakchakanichi sandienba, uni manggisiko uamangni nok sambao donggipa buringonikon man·aha.
Koborko on·ani gitade, ia mande batanggimin somoirangonin on·tisa gisikni gita dongtogijaniko man·engachim indiba darangba uko iandake so·ote sigen inede ka·dongsojahachim.