U·IATTIMGIPAONI
NONGPOH: Sukrobar pringo mikkarang jimbee waangani ja·man Ri Bhoi a·jani Jorabat-o donggipa National Highway (NH) 6 ramao chi banaha aro uandaken Shillong aro Guwahati-oni re·ruragiparang neng·nikanirangko chagrongna nangaha.
Ia ramao chirang dal·bae chonchongipa garirangkode tong·sa mripaha aro uandaken ramako re·ruraenggipa garirang, ia biapo adita somoirangna jachange dongna gita nangtokaha.
Kobor on·timgiparangni u·iatani gitade, Sukrobar pringo mikkarang jimbee waangani ja·man nalarangoni chirang joksrubae, ramako mripaha aro rama gita re·ruraenggipa mitam garirangkode chirang tong·sa mripaha.
Chirang banani a·sel rama gita re·ruraenggipa garirang, ua biaponi re·angna aro re·pilna gitaba man·jae ua biapon adita somoirangnade jachange dongna nangtokaha.
Ramao iandakgipa obostako chagrongna nangahani a·selan Shillong-oni Guwahati-ona aro Guwahati-oni Shillong-ona re·angenggipa garirangba ua biapo bewal ru·uten jachange dongna nangtokaha.
